رولا سعد ف كازا، مريام فارس ف الناظور، شيرين ف تطوان..والخير مزال كثير..
الفنانا ديالْ المشْرق ف هاد ثلثْ سنين التالية ولاوْ كايشوفو ف الموغريب جنة في صحراء الخريف السلفي، لأن ف بيروت وقرطاج تونس والقاهرة..القضية حامضة بزااف.
واشْ الموغريب اسثتناء؟ هذا سؤال سياسي وحْنا نجاوبوا عليه غير بالفن.
المغنية شيرين ف تطوان قالت "في خاطر ْ السيسي ساكْ" مجموعة ديال المتفرجين ردوا عليها:"في خاطرْ مُرسي كونطرا عليك آلسيسي"!
حاجة أخرى، كيفما كاين ف كُل مْدينة مهعرجان "النشاط حتى شاطْ" راه كاين فيها معطلين حاملي الشواهد ( بلا مانذكرو حاملي السواعدْ!) وهاذ المعطلين اللي متجاهلهم الإعلام عندهم واحدْ المُوالْ كايغنيوه بالموازاة مع هاذ البهرجاناتْ هو "آشْ خُصك آلعريان خُصْني مهرجان آمولايْ..آيْ ( آيْ :فعل توجعْ ينم على أن الزرواطة برققة الراس).
ماعلينا، المهم السيمي ديما خدام وما معطلش، كيفما كيكمد العظام ديال المعطلين كيدخل حتى ف المهرجانات، مثلا ف الحفل ديال الشعكوكة الدلُوعة مريام فارس ف الناظور بزافْ ديال الغاشي وْصلْ لأعلى درجات الزهْوْ والنشاط يعني "شداتهم قنْديشة" ..
إلى نشطنا وفرحنا كثرْ من القياس كايضربنا المخزن وإلى غضبنا عاوتاني كايبوقنا ريوسنا..
0 التعليقات:
إرسال تعليق
تعليقات الزوار لا تعبر عن رأي الموقع